![]() |
विट्यातील एमडी ड्रग्ज गुन्ह्यातील 3 आरोपींना अटक |
सांगली : हॅलो प्रभात
एमडी ड्रग्ज प्रकरणाचे मुंबई कनेक्शन स्थानिक गुन्हे अन्वेषणच्या पथकाने उघडकीस आणले असून कारखान्यास आर्थिक मदत, ड्रग्ज बनवण्यासाठी मार्गदर्शन करणाऱ्या तिघांना अटक केली आहे. येथील खानापूर तालुक्यातील कर्वे येथे एमडी ड्रग्ज बनवणाऱ्या कारखान्यावर छापा टाकून सदरचा कारखाना काही दिवसांपूर्वी उध्वस्त करण्यात आला. संशयित जितेंद्र परमार (वय ४१, रा नागडोंगरी, सध्या रा. माहिम), अब्दुलरज्जाक शेख (वय ५३, रा.पवई, ) आणि सरदार पाटील (वय ३४, रा. शेणे) अशी अटक केलेल्यांची नावे आहेत. या गुन्ह्यातील मशीनरी आणि केमिकल्सच्या तपासासाठी सांगली पोलिसांची पथके मुंबई, दिल्ली आणि गुजरात येथे रवाना झाल्याची माहिती पोलीस अधीक्षक संदीप घुगे यांनी पत्रकार परिषदेत दिली.
याबाबत पोलिस अधीक्षक घुगे म्हणाले, विटा जवळील कार्वे येथील औद्योगिक वसाहतीमध्ये बंद कारखान्यात एमडी ड्रग्ज बनवणाऱ्या रहुदिप बोरिचा (रा. कोसंबा, जि. सुरत) सुलेमान शेख (रा. बांद्रा, मुंबई), बलराज अमर कातारी (वय २४, रा. विटा) या तिघांना दि. २७रोजी अटक करण्यात आली. त्यांनी बनवलेले २९ कोटी रूपयांचे १४ किलो ५०० ग्रॅम एमडी जप्त करण्यात आले. स्थानिक गुन्हे अन्वेषणकडे या प्रकरणाचा तपास सोपवण्यात आला. त्यांनी तिघांची कसून चौकशी केली. तेव्हा आणखी तिघे संशयित जितेंद्र परमार, अब्दुलरज्जाक शेख, सरदार पाटील यांची नावे निष्पन्न झाली. या सहाजणांची मुंबईतील ऑर्थर रोड कारागृहात ओळख झाली होती. सहाजणांनी जामिनावर मुक्त झाल्यानंतर एकत्र येऊन एमडी ड्रग्जचा कारखाना सुरू करण्याचे ठरवले. त्यानुसार रहुदिप याने दिल्ली येथून मशिनरी मागवली. सुलेमान शेख याने दिल्लीतील कंपनीस पैसे पाठवले. त्यानंतर दोघांनी बलराजच्या मदतीने विटा येथे मशिनरी बसवली. मशिनरी बसवण्यासाठी जितेंद्र याने आर्थिक मदत केली.
![]() |
Advertisement |
सरदार पाटील याला ड्रग्ज विषयी माहिती असल्यामुळे त्याने दोन-तीनवेळा येथे येऊन मार्गदर्शन केले. तर बलराज हा अब्दुलरज्जाक शेख याला पुणे, मुंबईत जाऊन माल देत होता. जितेंद्र, अब्दुलरज्जाक व सरदार या तिघांना फलटण येथून ताब्यात घेण्यात आले. अधीक्षक घुगे म्हणाले, आतापर्यंत सहाजणांना अटक केली असून आणखी कोणाचा सहभाग आहे काय? याचा तपास केला जाणार आहे. यावेळी स्थानिक गुन्हे अन्वेषणचे निरीक्षक सतीश शिंदे आणि अधिकारी, कर्मचारी उपस्थित होते.