 |
| सोशल मीडियावरील लोकप्रियता ठरली अपुरी रिल्स स्टार निर्मला नवले पराभूत |
शिरूर : हॅलो प्रभात
सोशल मीडियावर लाखो फॉलोअर्स असलेल्या कारेगावच्या माजी सरपंच आणि रिल्स स्टार निर्मला नवले यांचा जिल्हा परिषद निवडणुकीत पराभव झाला आहे. भाजपच्या मनीषा पाचंगे यांनी सुमारे २ हजार ७०० मतांच्या फरकाने विजय मिळवत बाजी मारली. शिरूर तालुक्यातील ही निवडणूक चर्चेचा विषय ठरली होती. सोशल मीडियावर प्रचंड लोकप्रियता, प्रचारसभांतील मोठी गर्दी आणि डिजिटल माध्यमांतील प्रभाव पाहता निर्मला नवले सहज विजयी होतील, असा अंदाज व्यक्त केला जात होता. मात्र प्रत्यक्ष मतदानात मतदारांनी वेगळाच कौल दिला.
प्रचाराच्या काळात मनीषा पाचंगे यांनी घराघरांत जाऊन संपर्क साधला, स्थानिक प्रश्नांवर भर दिला आणि मतदारांशी थेट संवाद ठेवला. त्यांच्या या सातत्यपूर्ण आणि शांत प्रचाराचे प्रतिबिंब निकालात स्पष्टपणे दिसून आले. दुसरीकडे, निर्मला नवले यांची ओळख प्रामुख्याने सोशल मीडियापुरती मर्यादित राहिल्याची चर्चा आता राजकीय वर्तुळात होत आहे. सभांतील गर्दी आणि ऑनलाइन प्रतिसाद असूनही प्रत्यक्ष मतदानात अपेक्षित पाठबळ मिळाले नाही.आयटी इंजिनिअर असलेल्या निर्मला नवले यांची ‘उच्चशिक्षित सरपंच’ म्हणून ओळख निर्माण झाली होती. सोशल मीडियावर त्यांचे पाच लाखांहून अधिक फॉलोअर्स असून, आलिशान गाडीचा व्हिडीओ व्हायरल झाल्यानंतर त्या अधिक चर्चेत आल्या होत्या.
